每周一書之「尹光」——藝跡文化推介《世界太無聊，我們需要文藝復興》

如果用今日介紹嘅呢本書去做一個比較，尹光嘅忽然爆紅，好可能可以歸功/歸咎於「樂壇太無聊，我們需要少理阿爸」。 雖然用尹光呢件單一事件，好難稱得上能夠同文藝復興整個藝術運動去比較。但係尹光忽然被重新發掘，撇除公關因素，或多或少來自普羅大眾對於現時香港樂壇氣氛嘅一種宣洩。從某知名論壇嘅觀察所得，對尹光投支持票等同以行動否定某當紅組合，是抗拒服從主流嘅反抗，而並非單純「復古」。

咁點解店長又會用呢本書去比較呢？雖然呢本書嘅作者一開頭就用「復古」兩個字去概括文藝復興呢四個字，但係細心啲睇落去，作者咁講無非係想引你繼續睇落去，而唔係拎住本聖經咁厚嘅藝術歷史書。正因為唔少人都以為文藝復興就係等同「復古」，作者開呢個頭係好聰明。不過再睇落去，作者的確成功用平民化嘅語言同例子同讀者逐一剖析文藝復興唔同時期嘅重要人物，由中世紀開始梳理當時社會背後發生緊乜嘢事，驅使到整個文藝復興運動一步步咁發展。作者提及九個重要人物同家族嘅故事，而部分人物相信大家都唔會太陌生，例如有波提切利、米開朗基羅、達文西、拉斐爾等等。就算大家覺得讀幾百年嘅藝術史係太heavy，淨係呢幾個人物嘅故事都非常值得大家知多啲。

尹光，分分鐘可能係香港樂壇文藝復興嘅第一炮，不過請你放開明禎BB先。