每周一書之「洗邋遢」——藝跡文化推介《穿過了：從人類服裝史發掘全球製衣體系背後的祕辛》

轉眼間就年廿八，唔知大家冇發現一個現象呢？ 最近店長返屋企嘅時候，成日見到𨋢口個大垃圾桶裝滿咗一袋又一袋嘅垃圾，有時仲會見到好幾大袋嘅舊衣物，而樓下嘅衣物回收箱就裝到爆曬，啲人唯有就咁一袋一袋放喺個回收箱隔離。究竟啲人點解會有咁多衫呢？新年通常買好多新衫，但係到年底又會丟咗啲衫。今日介紹呢本書嘅序言或者俾咗個答案大家。

作者短短幾頁就簡介咗衣物生產工業嘅歷史，隨著工業同埋物料嘅進步，衣物嘅價格越來越低。 根據作者引用嘅數字，喺最近十五年，消費者購買嘅衣服數量比過去多出六成，但係每件衣物留存嘅時間只有以前嘅一半。 而到咗2017年，平均每秒鐘就會有滿滿一箱垃圾車的衣物，被焚燒或運往掩埋場，這些數據正正係店長嘅觀察嘅宏觀版本。 除咗環保議題，仲引伸到關於工業化嘅勞工剝削。

呢本書嘅篇章用衣物嘅物料區分，從亞麻布開始講起，即係舊石器時代去到19世紀普遍使用嘅衣物物料。作者採用採訪報道同埋歷史考證嘅方法 去編寫呢一本書，除咗介紹衣物生產嘅歷史，更加介紹咗好多關於紡織嘅不同面向與及相關主題。